හිම මලක උණුහුම.....

 

‍‍හරිත පැහැ සොරා ගෙන පත් හැලූ ඕතමය

උතුරු සුළඟින් දැවී ජනිත වූ සිසිරය

කැරලි කර දඟ කැවූ හිම තුහින විසුරුවා

මකන විට වසන්තය ඉතිරි කල මල් සුවඳ

පිපුණු සඳ දිය ගඟුල

ගලා ගිය හිම සයුර

කැලතවී රැළි නැගෙයි

වියරු සුළඟට නතුව

උණුහුමක උණුහුමට තුරුළුව

කදා බඳුනක පතුල රැඳි

තෙතක් විඳි පමණකින්

නෙතු පියන් විවර කර

හීන් සුසුමක් හෙලයි

වියලැවී කෘශව ගිය

දැහැටි දඬුවක සැඟව

නිදාහුන් ජීවිතය...!

ජනවාරි 5, 2026

Continue Reading...

සදා හරිත....

අහඹුවෙන් අහලින් ගලන
සුළං රළකට අවනතව
සොලවතොත් මිසක අතැඟිලි
සදා හරිත තුරකට වුවද
පිස දමන්නට නොහැක හිම තුහින
ගිනියම් සීතලෙත් නොහැලෙන
හරිත පත් මත සිනාසෙන කල

පහත් වී බලන්නට පොළව
නෙත් නගා බලන්නට අහස
හිත් ලලා දිගුකලක්
හෙමි හෙමින් වඩවතත්
රිකිලි අත් ලපටි පත්
පිපුණු නෙත්

වස්සාන වැසි නිමව
ගිම්හාන උණුහුමට
නිල මැකී කහ මතුව
රත්වන්ව ලේ පිරෙන
පත් හලන ගස් අතර
සදා හරිතව නැගෙන
සදා හරිත තුරකට වුවද
පිස දමන්නට නොහැක
ගිනියම් සීතලෙත් නොහැලෙන
හරිත පත් මත සිනාසෙන කල
සිසිරයේ සුදෝසුදු පිරුවටය....

අහඹුවෙන් අහලින් ගලන
සුළං රළකට අවනතව
සොලවතොත් මිසක අතැඟිලි....


ජනවාරි 5, 2025

Continue Reading...

හුම්මානය

පෙනෙන තෙක් මානයට ඈතින්

අහස ඇවිදින් පහතට

මුහුදු වතුරට ගෑවෙන

සක්වල ගලට එපිටින්

උදේ හවසට ගිනි දැලින් දැල්වී

දේදුන්නෙ පාට කැලතෙන

ඉසව්වේ මෝදුවෙන

නා නා වර්ණ සියුමැලි

සුසිනිඳු කුසුම් සුවඳැති

එකතු කරගෙන දෝතට

තුරුළු කරගෙන ලමැදට

සඟවාන නොපෙනෙන්න

රහසින්ම සිපගන්න

නග නගා විත් සරැලි මැසිවිලි

දණ නවා සීරුවට වෙරලස

අතුරලා වැලි තලාවක

පුබුදුවන මල් මල් ලතාවක

බලන හැඩ වැඩ

නිමේෂය ගැන 

දරා සිත සිතිවිලි

හිස නගා අහසට

ගත නවා ගැඹුරට

අත යොමා අහුලා

සුසුදු බෙලිකටු

සයුරු පතුලත

දුව දුවා ආවත් වෙරළස

ගල් කුළක බිම්ගෙයක සැඟවෙන

වෙරළ විසිරී
පලසක්ව ඇතිරී
මල් පිපෙන
වරම් නැති

වෙස්සන්තරය මුමුණන
මුහුදු රළ

මිහිකතගෙ ගිනිගැනුනු හදවත

දියව වැගිරුනු රුහිරු වියැලී

ජනිත වූ ආග්නේය පාෂාණ

ඇතිරුණු මළුව සලපතල

සිඳ බිඳ කීතු කීතු කර

පිපිරවිය නොහැක්කෙන්

ගිරි බෙයද අතරින්

හිරව තෙරපී වැර නගා රිංගා

නැගී අහසට
බිඳු බිඳුව විසුරයි

කරිජ්ජ දිය මල් පොකුර
පෙති පෙති කඩා කුඩු කර

නොහැකියෙන් ගැයුමට
සොඳුරු ගී පද බැඳ

හූම් ගා... හූම් ගා...
මොරදේය හුම්මානය

ජනවාරි, 5, 2024

Continue Reading...

විස්සයි විසි තුන

 

කල් ඉකුත් වූ කලට මල් පිපෙන වසන්තය
මැවී ඉහිරෙයි අරුම පුදුමව සුදුම සුදු හිම

ගලා යන්නට නොදී නවතා
පාෂාණිභූචිතව රැඳවූ මිරිදිය...

පුළුන් මල් විසුරුවා හඳ එළිය පාටට
වසං කරවා ඉඳු දුන්නෙ හත් පෙත්ත

අළුත් නමකුත් මුමුණ මුමුණා

උදාවෙයි මලානික සිසිරය...

උතුරු මාරුතය සිඹ කඳුළු බර මෝසම

මුදා හල දුක් දෝමනස්සයන් හැම

මිදී ගිලිහී තාරකා වී රැඳෙයි

තුරු අගිසි සඳළු තල මත...

සදාහරිතය සථප කල දේවදාරය

මැලවුනු හරිත පැහැ නිය අග
බදා අල්ලා  කඳුළු ගල් කැට

හිඳී නිසලව ශ්වේත තප්තව...

නිම්නයේ කෙළවරක මිදුණු විල අද්දරක

මල් ගොමුව ගුම් නැගුනු මුණු මුණුව

වසාගෙන වැළඳගත් හෙවනැල්ල

අහිමි වූ සෝ බරිත එල්ම් ගස...

සලයි හිම තුහින රැඳි තුංග හිස

නොගිලිහුනු මතකයක අගිසි අග

පත් මෙන්ම අත් නගා ඉගිල ගොස්

නිහඬ වී නිසල වුනු 

සකුන් ගී නද රැඳි වසන්තය...!

ජනවාරි 5, 2023

Continue Reading...

පැවතීම කියන්නේ නැවතීමක් නොවෙයි ස්වර්ණා...

පැවතීම කියන්නේ නැවතීමක් නොවෙයි ස්වර්ණා

වෙනස් වුනු දේවලුත් වෙනස් වෙනවා ස්වර්ණා

පරමාණු එකතු වෙලා සංයෝග හැදෙනවා වගේමයි

සංයෝග බිඳිලා පරමාණු හැදෙන එකත් 

යකඩයි අම්ලකර වායුවයි එකතු වෙලා

මළකඩ හැදෙනවා වගේම ස්වර්ණා

මළකඩ වලින් අම්ලකර ඉවත්කරලා

ආපහු යකඩ හැදෙනෙකත්

වෙනසක් ස්වර්ණා....

සරලව කියනවා නම් ස්වර්ණා
එකතු වෙන දේ වෙන්වෙනවා

වෙන්වෙන දේ එකතු වෙනවා

එකතුවීම වගේම වෙන්වීමත්

වෙනස් වීම්ම තමයි ස්වර්ණා

අපට නැවතිලායි හිතුණාට

මේ බොහෝ දේවල්

එහෙම පේන්නේ

එකතුවෙන වේගෙන්ම වෙන්වෙලා

වෙන්වෙන වේගෙන්ම 

ආපහු එකතු වෙන නිසයි ස්වර්ණා....

නොවෙනස්ව අචලව ස්ථිරව

පවතිනවායි කිව්වාට ස්වර්ණා....

එතනත් බොහෝවිට තියෙන්නේ

වෙනස්වීමත් ආයෙත් වෙනස් වීමත්

සමතුලිත වීමක් නේ ද?

නැවතුනු දාට ස්වර්ණා පැවතීමක් නෑ....!

ජනවාරි 5, 2022

Continue Reading...

ආවාට විලේ මහල්ලා....!

හදක් දැවුනු ළය මඬලක ගිනි දළු පිපිරී
උරත් පලා නැග අහසට ලෝ දිය විසිරී
හිසත් සිඳූ ගිනි කන්දක පපු තුර පැහැරී
විලක් හැදුනි නිල් දියවර ඉතිරී පැතිරී

එ’ විල් තෙරම වන ලැහැබක උපන් තුරක් දෝ
එ’ කඳු හිසම මල් යහනක ඔකඳ වුනා දෝ
එ’ ගිනි කන්ද සිප සනසන දොලක් උපන් දෝ
එ’ ගිනි නිවුණු  දා කඳු හිස සෙවන කලා දෝ

වසත් කලෙක වට වැස්සක අහස පිබිදිලා
පවස් සිඳුණු මිහිකත ඉපිලෙද්දි දිය ගලා
පවත් නොදැන ඉගිලුනු දා දෙපා බොඳවෙලා
ගියත් සිඳී අතු ඉති පත් නැතිය පැරදිලා

ගඟක දොලක දිය කඳුරක ගිලී පා වෙවී
පියුම් පිපුණු සැඩ පහරක රැඳී ලතැ වෙවී
ඇදී ඇදී ඇදී අවුත් සිටියි නතරවී
නැවුම් විලක දිය ගැඹරෙක නොවී සසලැවී

වසත් සමේ මලින් පිරෙන විල්තෙරේ ලපල්
ගියත් මකා සිසිර සිහිල පිරුණු නල කැරැල්
හිමත් මිදී විලත් වැසෙයි මිහිදුමේ දුහුල්
බියත් සැකත් ඇතත් නැතිය සැසැලිලා අකල්

අහස පුරා කළුවර සළු ඇතිරෙනා පැයේ
සිඟිති එළිය බිංදු ඉසී දිලිසෙනා රැයේ
පහන පිපී හිත ඉපිලෙන විහඟ ගීතයේ
සියක් වසක් බලා හිඳීයි කරවටක් දියේ

හිසක් ලයක් නොමැති නිසල කවඳකට කෙතෙක්
කලක් ගියත් මතක් වේද නිදන ඇසිල්ලක්
පයක් නොරැඳි තරම් ගැඹුරු නරා විල් දියක්
ගෙයක් අහිමි තුරක් සරයි නැතිව නැවතුමක්

මුලිනි’දිරී දෙදණ වැටී මියෙන ලෝකයේ
සුවඳ පිපේ ඉතිර හැලේ මියුරු තානයේ
හිසද සිඳී දියෙහි ගිලී ගයන ගීතයේ
නැගිට නැගී විල තනිවූ ඉන්ද්‍ර චාපයේ

ඉපිල නටන තුරු හිස් සිඹ සිහින රැඳෙව්වේ
පිපෙන පිපෙන මල් වල පෙති පැහැ ගැන්වූවේ
නැගෙන බසින දිය රළ රැලි පොඩිති නැලෙව්වේ
විලක ගිලුණු පැරණි තුරකි සතුටු කොදෙව්වේ

2020 ජනවාරි පස්වෙනිදා

පසුබිම් සටහන:

ඇමරිකා එක්සත් ජනපද ස්වදේශිකයන්ගේ ප්‍රවාදයන්ට අනුව, ප්‍රාදේශීය නායකයකු ගේ දියණියක පැතූ,  පාතාලාධිපති දෙවියා ලෙඕ, සැතපුමක් පමණ උස්වූ, ඔරිගන් හි මෂාමා කන්ද මුදුනේ ගිණි ජාලාවක් මවා, ලෝ දිය උතුරවා හැරියේය. එයින් උරණ වූ ගුවනාධිපති දෙවි ස්කෙල්, කැලිෆෝනියාවේ ෂාශ්ඨා කඳු මුදුනේ සිට විසල් ගිණි ගුලි එවා මෂාමා කඳු හිස සුනු විසුණු කර උදුරා උගුලුවා දැමීය. ඒ රාත්‍රිය අවසන, ලෙඕ නැවත පාතාල ලෝකයට වැද සැඟවුණු අතර, ස්කෙල්, සිය ජයග්‍රහණය සනිටුහන් කරනු වස්, මෂාම කඳු මුදුනත සැදුනු විසල් ආවාටය නිල් දියෙන් පුරවාලීය.

මෙසේ උපන්නේයැයි සැලකෙන, අඩි හැත්තෑ දහසක් උස්වූ කඳු මුදුනතක පිහිටි, සැතපුම් හයක් පමණ විසල් වූද, අඩි දෙදහසක් පමණ ගැඹුරු වූද,  ඔරිගන් ආවාට විලෙහි අපූරු පදිංචිකරුවෙක් වෙසෙයි. ඒ, විලේ මහල්ලා; “The Old Man of the Lake”; නමින් හැඳින්වෙන, නිරීක්ෂණ වාර්තා අනුව, අවුරුදු සියයකට අධික කාලයක් විල් දියෙහි සිටින්නේ යැයි සාධක ඇති, සිරස් අතට ජලයේ පාවෙන, විසල් තුරු කඳකි. 

ජල මට්ටමෙන් අඩි හතරක් පමණ ඉහලට එසවී ඇති, හිස සුන්, මේ තුරු කඳ, ජල මට්ටම ආසන්නයේ අඩි දෙකක් පමණ විශ්කම්භයකින් යුතුය. ජලය තුල ගිලී ඇති කොටස අඩි තිහක් පමණ වේ යැයි නිර්ණය කර තිබේ. කාබන් කාල නිර්ණයන්ට අනුව තුරු කඳේ වයස අවුරුදු හාරසිය පණහක් පමණ වේ යැයි ගණනය කර තිබෙයි. 

කිසිදු ගංගාවකින් පෝෂණය නොලබන, මෂාමා කන්දේ ආවාට විලට, මේ යෝධ ගස,  යම් කලක සිදුවූ අධික වර්ෂාපතනයක් හෝ නාය යාමක් හේතුවෙන් ඉවුරකින්ම ඉදිරී දියකඳ සමග ඇදීවුත් පතිත වූයේ යැයි සිතනු ලබයි.

ශතකයකට අධික කාලයක්, හුදකලා කඳු මුදුනක පිහිටි ආවාට විලක නොගිලී, නොපෙරෙලී පාවෙන, ආවාට විලේ මහල්ලා, අද වන විට, බලාපොරොත්තු විය හැකි පරිද්දෙන්ම, ඔරිගන් ආවාට විල් උද්‍යාන සංකීර්ණයට සංචාරකයින් කැඳවන ආකර්ෂණයක් වී තිබේ.

ඔරිගන් ආවාට විල අහසට පෙනෙනයුරු

ආශ්‍රිත:

https://www.npca.org/articles/1016-the-old-man-of-the-lake

https://en.wikipedia.org/wiki/Old_Man_of_the_Lake

https://en.wikipedia.org/wiki/Llao

https://mikedashhistory.com/2011/05/09/the-old-man-of-the-lake/

පින්තූර අවසනට සඳහන් ආශ්රිතයෙනි.

Continue Reading...

ජනවාරි පහ දෙදාස් විස්ස

අතේ මිටි කරන් ආ කිසි දෙයක් නැත

කෙතේ පීදෙනා ගොයමට හෙටක් නැත

නෙතේ උපදිනා කඳුලක හැඩක් නැත

හිතේ තරමටම ලොකුවුනු පතක් නැත

දියේ උපන් දිය නොරඳන නෙළුම් පත

ගියේ කොතැනකද නොදනිමි ලපැටි සිත

මියේ යලි යලිත් දළුලන සිතුම් කෙත

ලයේ හංගලා සුරකිමි මතක පොත

ඉරේ දැල්වෙනා ගින්දර ඉරු ගිනි සේමා

කැලේ ඇවිලෙනා ගින්දර ලැව් ගිනි සේමා

හදේ උපදිනා ගින්දර හද ගිනි සේමා

වෙස්සන්තරේ ගින්දර දරු දුක සේමා

ජනවාරි 5, 2020

Continue Reading...

දොර ඇරපන් අමල් බිසෝ..... (2019)

නිවුණු ගිණි අඟුරුය
තැන තැන තවම දැල්වෙන
අඳුරු අහසේ විසිර
දිදුළු දෙන තරු කැට
අවර්ණය ලෝකයම
පාට කරනා තුරු
ඇතිල්ලී හිරු රළ

සුගති උයනේ ඇපල් ගස මුල
දිරායයි හැව සර්පයා ඉතිරි කල
බිම හෙවුණු තුරු බඳක ඇණ තියා
සුසුම් ලයි විටින් විට
සූරා නහය
වීසීකර සෙම් සොටු
පිසදා ලේන්සුවකින්
බලාගත් අත බලා ඉන්නා
කකුල් ඉදිමුණු දෙවියෝ

දිරා ගිය යකඩ ගේට්ටුව ලඟ මුරය
කුදු ගැහුණු ගබිරියෙල්
ඉඳ හිටක මිරිකයි කඩු මිට
ගිනි දළුව විද දවා
පන්නා දමන්නට
මැස්සෙක් මදුරුවෙක්...

පහල පාරේ වංගුවෙන් එපිට
ආදං ගේ කඩේ වයර්ලැස් එක
පාව එයි 
උඩු හුළඟ දිග
කම්මැලි කමට 
ගාට ගාටා හමන

"කවාලා විළඳ ජාතී...
ඇති කලා...ත් රන්...
කූ...ඩු වේ ගිරවා
දමාලා... 
යන්නෙ ඉගිලී
රැව් දි දී ලබ...
නාසෙ වන සැපතා....."

ජනවාරි 5, 2019

Continue Reading...

වෙරලස (2018)

පොලා පනියි හිතිවිලි රැලි හිනාවෙන සුදු

බලා හිඳිමි වෙරලස හිඳ සුමුදු සුදු මුදු

සලා දියඹ කිති කවනා මාරුතේ රුදු

ගලා බිඳෙන දිය රැලි අග සිනා බිඳු රැඳූ

වසන්තයට පාර හොයන ලපැටි නිල් දළු

දිගන්තයක සැඟවෙනවා පිරුණු මේ කුළු

පියාඹන්න තටු මොකටද සිතකි සිත් කළු

කලා වැවට දිය දෙන්නෙත් වැහි වලා කුළු

සිලි සිලියක මද සුවඳක පාවෙනා අහස්

ගඟක තරඟ පොඩි මුතුකැට තාරකා දහස්

හීන් හඬින් කියන සිංදු ස්වර දස දහස්

වැලි කැටයක දිය බිඳුවක සැඟවෙනා රහස්

කතා නැතිව හීන ගෙනෙන රැයක මැදියමේ

ලතාවකට පිණි ඇවිණෙන සීත මීදුමේ

වතාවතකි දුරුතු හඳේ එළිය මායිමේ

දියත් ගොඩත් මුණ ගැහෙනා සයුරු කඩයිමේ

එදා මෙදා නොවෙනා මුත් මෙදා එදා වෙයි

සදා ළඟින් ඉන්නා අය සදා හරිත මයි‍

කොහේ කොහොම වුනත් හිතේ සුවඳ මල් පිපෙයි

එහේ මෙහේ කොහේ වුනත් ගලන ගඟ ගලයි

[ජනවාරි 5, 2018]

Continue Reading...

හේමන්ත දං පොකුරු (2017)

රතෙන් රත් පෑ වූ
නෙතින් නෙත නෙක දෑ ලිවූ
හේමන්ත දං පොකුරු
හිම කතර තනි වූ
හිමෙන් හිස
මල් ඔටුණු රැඳවූ....

වසන්තය පුරාවට
අතු පතර සඟවාන
පිපුණු මල් පෙති රකින
හේමන්ත සීතලට
පත් හලන ඵල දරන

පත් නොමැති රිකිලි අග
රත් පොකුරු දිලෙන සඳ
උණු හිමෙන් වැසුණු බිම
සැඟව නිදි වසන්තය

මල් පිපුණි දැයි නොදැන
ඈත ගිය විහඟුනට
එන්න එන්නැයි කියා
දුරුත්තේ මොරගසන

විහඟ තුඩගක නොරැඳි
වස්සාන වැස්සට හැලෙන
රත් පෑය ඉගිල ගොස්
නිල් කළුව මැලව යන

ඒත් හිම මල් පැළඳ
රත් වනින් සිනා‍සෙන
අඳුරු හේමන්තයට
හාදු දෙන රත් අදර

හේමන්ත දං පොකුරු
හිම කතර තනි වූ
හිමෙන් හිස
මල් ඔටුණු රැඳවූ....

[ ජනවාරි 5, 2017]

Continue Reading...

වළලු (2016)

ජීවිතය ගලායන ෆ්ලෝයමය
මියැදෙමින් උපද්දන
කොරස් කටු පොත්ත හංගන 
බඳ බැඳුණු සලකුණුය
ගල්වු අරටුව වටා
ප්‍රාණ පිරි කැම්බියම
වසින් වස ලකුණු කළ

වසන්තය අකුරු කළ 
මුදු සෛල සෛලමය
ගිම්හානයේ අග 
සරත් කල ඝනව ගිය
අඳුරු රේඛා අතර
සුව සිහින සටහන්ය
ඉකුත් වූ ජීවිතය

අසෙනි සර වැස්ස යට
අහස් හිස සිසාරා
වලාකුළු තල්ලු කළ
අහඹු සුළි සුලං මැද
හිස නගා සිටි පවින්
දැදුරු වූ අරටුවය

මුලින් උදුරා වැටී
දැති කියත් දම්වැලෙන්
කඩින් කඩ කොටන් කර
කපා සීරූ රිදුම්
පිරිමදින්නට නැතිය
පතක් වත් ගිලිහ ගිය
කැපෙද්දී ඉහළ අතු...!

*ෆ්ලෝයමය (Phloem) - ගසක කඳේ පිට පොත්ත අැතුලතින් පිහිටා අැති අාහාර ප්‍රවාහනය කරන්නාවූ පටක
කැම්බියම (Cambium) - ෆ්ලෝයමයත් දැවමය සෙෙලමයත් අතර පිහිටි සෙෙල විභේදනය වී ගසෙහි වැඩීම සිදුවන තුනී පටක ස්ථරය
සෙෙලමය (Xylem) - කැම්බියම් සෙෙල විභේදනය වී සෑදෙන දැවමය කොටස. වාර්ෂික වළලු සටහන් වන්නේ මෙහිය. සෙෙලමයේ මධ්‍යම කොටස වඩාත් ඝනවී අරටුව සෑදේ.

2016 ජනවාරි 5

http://www.boondi.lk/article.php?ArtID=4875

Continue Reading...

අට ගැසීම (2015)

අඬන වැලි පාගමින්
තව තවත් හඬවනා
බයිසිකල් රෝද දෙක
නැවත නැවතත් ඇවිත්
එකම කතිරය ගසයි

කතිරයේ උඩ යටින්
අඩ හඳේ හැඩ ඇඳී
හීන් කොටු ඉරිවලින්
වැලි මිදුල පිරවිලා
මුලින් මුල අලවාපු
කඳුළු බිඳු දෙකක් මෙන්
අටේ ඉලක්කම ඇඳෙයි...

“අඩේ උඹ දැන් හුඟ සැරයක් ගියා...
ඊළඟට මගෙ වාරෙ...”

“තව දහපාරකින් දෙන්නං...
බයිසිකලේ මගෙ...”

ජනවාරි 5, 2015

Continue Reading...

පනස් හත...!(2014)

කිරි පිරුණු පිඟානක් වලා කුළු මත නැගී
පාවයයි පාවයයි නොනැවතී නොම රැඳී
සයුරු රළ ලතාවට හිස සලා යයි ඇදී
දබරැඟිලි තුඩින් ඇඳ තෙමුණු වැලි තලාවේ
මා ලියූ අකුරු වැල් පිස දමා සිනාසී

කඳු හිසක ඇස් වැසුව දුහුල් මීදුම් පටල
සිඳ බින්ද සුළි සුළඟ මද නලක් වී ඇදෙයි
මකරන් ද අතින් ගෙන බඹරිඳු ට සිනාසී
ඉඟිමැරූ තඹුරු පෙති සසලවා විසුරුවා
විලේ නැගෙනා තරඟ අතර සඟවා රඳා

ගීතයකි ජීවිතය විලඹ ලයකින් ගැයෙන
සිහිනයක්මයි නමුත් සිතුවමක් වී රැ‍ඳෙන
තුරුල්ලෙහි හිස හොවා නෙත් පියා ගනිමි මම
උණුහුම්ය ආදරය ගලාවිත් හිත තෙමා
පියාපත් පළඳවා පියාසර කරවනා…!


5 ජනවාරි 2014

Continue Reading...

කළු රෝස (2013)

ජීවිතය අත දරා
මා වටා කරකැවෙන
හිරු සඳු ද තරු බිඳු ද
කරකැවී තවත් වටයක්
නතරවී ඉසිඹුවක්
ආදරය පුරාගත්
අත් ඇඟිලි දිගුකර
කපොලු තල පිරිමදිති

සිසිරයේ සීත සුසුමට
ගල් ගැසී මිදුන දිය මත
නතරවනු නොහැකිව දුවන
අවපැහැව රත සිඳුණු
වියලි මේපල් කොළයක
මුතුවක්ව මිදුනු දිය බිඳක්
විසුරුවයි උදා හිරු රළ
දේදුනු වණින් පැහැකර

ඵලකයෙහි තැන තැන
අඳුරු පැල්ලම් බිඳුය
බොරපැහැය දිය බඳුන
තෙලි කූර පොඟවන
කහ ගැහුණු පත් මත
පාට නැති දිය උලා
අඳිමි මම අඳිමි මම
තෙත රඳා පෙති විදා
සිනාසෙන මල් පොකුරු
කළු රෝස සුවඳ ඇති...!

2013 ජනවාරි 5

http://www.boondi.lk/article.php?ArtID=3144

Continue Reading...

ජනවාරි 5, 2011

 (35)

කැකුළු පෙති විහිදුවා පිබිදෙන
චින්තාව නිවහල්
සුවඳ විහිදන නැගී නොබියව
උදාරව නැණ පහන් සුදිලෙන
නිදහසේ තුඟු ස්වර්ගයයි...

නෙත් යොමා මම සොයන්නේ
සිතිජ කෙලවර සිහිනයේ...

හීන මානස පවුරු බැමි බිඳ
සත්‍යයයේ දිය බුබුළ පතුලත
ඉපිද විසිරෙන වදන් දිය බිඳු
රඳා දෙතොලත නැවුම් ගී සේ
සුසුදු පිරිපුන් මනුෂ්‍යත්වය
දෝත් විහිදා වැලඳගන්නා
මගේ නිවහල් දේශයයි

සම්ප්‍රදායේ කතර වැලිතල
නොසඟවන බුද්ධියේ සිහිලඹ
සිතැඟි සේ සිතුවිලිව පුබු දා
නැගි නැගී එන දිරිය දරුකැල
පෘථුල තැනිබිම සිසාරා
ජීවයේ සිසිලස පතුරුවන
මගේ නිවහල් දේශයයි

‍නෙත් යොමා මම සොයන්නේ
සිතිජ කෙලවර සිහිනයේ...

කැකුළු පෙති විහිදුවා පිබිදෙන
චින්තාව නිවහල්
සුවඳ විහිදන නැගී නොබියව
උදාරව නැණ පහන් සුදිලෙන
නිදහසේ තුඟු ස්වර්ගයයි...!
-.-

Where the mind is without fear and the head is held high;

Where knowledge is free;

Where the world has not been broken up into fragments by narrow domestic walls;

Where words come out from the depth of truth;

Where tireless striving stretches its arms towards perfection;

Where the clear stream of reason has not lost its way into the dreary desert sand of dead habit;

Where the mind is led forward by thee into ever-widening thought and action---
Into that heaven of freedom, my Father, let my country awake.
.

Continue Reading...

ජනවාරි 5, 2010

ජනවාරි 5, 2010

වවුල් හප වල ඇටත්
මුල් ඇදී පැලවෙලා
මහරු අඹ ගස් හැදෙයි
මල් පිපෙණ ගෙඩි හැදෙන

රැලි වැටී පොතු බිඳී
කරගැහුණු අඹ ගසුත්
දළු ලතිය හිනැහෙතිය 
මල් පිපී දී සුවඳ

පතුල හිල් පොල් කටුව
පැන් මනුවෙ ජීවිතේ
දිය පිරී බරව මුත්
පාවයයි හෙමි හෙමින්

හුස්ම අල්ලා හිඳිමි
සුවඳ අඹ මල් දකිමි
හදවතේ ආදරේ
ගීතිකා ගැයේවිය
තවත් තවමත්...
අද වගේමත් හෙටත්...! 

Continue Reading...