Sunday, January 29, 2023

සම්ප්‍රදාය - හබීබ් ජලිබ්

 



සම්ප්‍රදාය - The System
-හබිබ් ජලිබ්

මාළිගා මැදුරු තුල පමණක්ම දිදුළන එළිය
ගිනිලා දවයි සෙවනැලි අතර සැඟවුණු මිනිසුන්ගේ සතුට සැනසුම
උන්ගේම දුබලකම් වලින් උරා උදුරාගෙන ශක්තිය
එවන් වූ සම්ප්‍රදාය...
ආලෝකයක් නොමැති අරුණෝදය...
පිළිනොගන්නෙමි මම... !
හෙලා දකිමි මම... !



බිය නොවෙමි මම මරා දැමුවත්
ලෝකයම දැනගනීවි මා පණ පිදූ වග
බිය කල හැකිද මා දඟගෙදර පවුරින් වටකර... ?
මේ ගැබ්බර වූ විනාශය...
අමනකමේ රාත්‍රිය...
පිළිනොගන්නෙමි මම... !
හෙලා දකිමි මම... !

"කැකුළු මල් පීදේය අතු අග" ඔබ කියයි මට
"සෑම බඳුනක්ම පිරී ඉතිරේ" ඔබ කියයි මට
"ඔය තුවාල ඉබේම ඒවාම සුව කර ගනීවි" ඔබ කියයි මට
අපේ නුවණැසට ගරහන...
මෙවැනි නිර්ලජ්ජී මුසාවාද‍...
පිළිනොගන්නෙමි මම... !
හෙලා දකිමි මම... !

සියවස් ගණනාවක් පුරා ඔබ සියල්ලන් කොල්ල කන ලදි අපේ සිත් සැනසුම
එහෙත් අප පෙලන ඔබේ බලයේ අවසානය ලඟාවෙයි‍ අද හෙටම...
වේදනාවන් නසන්නට...
ඔබට හැකියැයි අඟවමින් අප රවටන්නේ ඇයි... ?
ඔබ ‍ඔවුන් සුවපත් කළේ යැයි පිරිසක් කියතත්...
පිළිනොගන්නෙමි මම... !
හෙලා දකිමි මම... !

-හබිබ් ජලිබ් (1928 – 1993)

ජෙනරාල් අයුබ් ඛාන් ගේ ඒකාධිපති ව්‍යවස්ථාවට එරෙහිව පාකිස්ථාන කිවි, හබිබ් ජලිබ් (1928 – 1993) විසින් 1962 දී රචිත "Dastoor (The System)" නම් කව්පෙලෙහි සිංහල පරිවර්තනයකි. සිය වාමාංශික හා ජනතාවාදී ආකල්ප විදහා දැක්වෙන සාහිත්‍ය කරණය හා ක්‍රියාකාරකම් හේතුවෙන් කිහිපවිටක්ම අසත්‍ය චෝදනා මත සිර දඬුවම් විඳි හබිබ් ජලිබ්, නුතන පාකිස්ථානයේ ඉතාමත් ජනප්‍රිය හා ජනහිතවාදී කවියා ලෙස සැලකේ.

බූන්දියේ 2012 - ජනවාරි යේ පළවූවකි.




Continue Reading...

නිදහස....!

 


අකාසෙ ඔහේ පියාඹන වළාකුලකට
හැඩයකුත් තියෙන්න ඕන ද?

කොහෙන් ආවා ද නොදැන
කොහේ යනවාද නොදැන
ඉබේ පාවෙන වළාකුලකින්
යන දිහා අහන එක සුදුසු ද?

වළාකුළු ගස් නෙවෙයි
මුල් ඇදන් පොළවට
බදාගෙන නැවතී ඉන්න
මල් පිපෙන කොල හැදෙන
අව්ව වැස්සට හෙවන දෙන

ඉතින්....
ආකාසෙ ඔහේ පියඹන වළාකුලකට
හැඩයකුත් තියෙන්න ඕන ද?

2 සැප්තැම්බර 2021

Continue Reading...

පුංචි පොඩි මල්....!

 


මලක් ඇතුලෙත් 
දහස් ගණනක් 
පුංචි පොඩි මල් තියෙනවා 

එකක් පරවෙන 
වරක් පාසා 
තව මලක පෙති ඇරෙනවා 

අපිත් එහෙමයි 
අපිත් එහෙමයි 
කියා අපටත් හිතෙනවා 

දවස ගානේ 
අළුත් සුවඳට 
අළුත් පොඩි මල් පිපෙනවා 

6 අගෝස්තු 2020
Continue Reading...

තුත්තිරි ප්‍රේමය





 Jul 4, 2020, 
පාට පාටට
රටා නැතුවට
සිඟිති තුත්තිරි
ගහත් මල් ඵල දරනවා

ආස හිතුණොත්
සුළං රැල්ලක
අතක් අල්ලා
ලඟට එන මල් සිඹිනවා

Continue Reading...

දම්පාට හීන...




ආත්මයකට වුනත්
උවමනයි අන්ධකාරය
ආලෝකය වගේම ....
ඉර එක්ක පිපුණාට
ගස්වල වුනත්
මල් හැදෙන්නේ රෑට.....

6 ජුනි 2021
Continue Reading...

මතක පෙති

 


පිපෙන මල් පෙත්තක ඉරුණු රිදුමක් දකිමි
මැකෙන තරු එළියක සුවඳ බිඳුවක් සිඹිමි
අඳුරු නිල් අහසක සොඳුරු සිතුවම් සොයමි
මිලින වූ කුසුමක මතක අහුරක නිදමි

22 මැයි 2021

Continue Reading...

ගිනිගත් බක් සඳ....

 



දැදුරු හද මඬල සිදුරෙහි
මිටි කෙරුව දකුණත හොවමි
සොඳුරු මතකය වසා
ලේ කැටිති අතුරවමි

අඳුරු පෙත් මග දෙපස
විසිරවුනු මල් පෙති දකිමි
අඩ දැණිව පහත් වී
පා ලකුණු සිඹගනිමි

පළුදු වූ අහස එළලා
කළු වලාකුළු අවුණා
හැකි ද සකි නවතන්න
සොමි කිරණ....
රක්ත තප්තව ගලන...!

25 අප්‍රියෙල් 2021

Continue Reading...

ඇහැළ මල් පෙති....

 




වසන්තය ගැන සිතා
නොහැලි පත් පිරිමදින
උස්ම පොප්ලර් ගසක්
ඇහැළ මල් පෙති හලයි

කහ ඇහැළ පෙති රැඳෙන
විල් තෙරක හිම මිදුන
සුදු දෙපෙති පත් විදා
ලිලී පොකුරක් පිපෙයි

රළක් ඇවිදින් වැතිර
නිමක් නැති නිමේෂෙක
නිදා හුන් වෙරළ මත
තෙතක් ඉතිරිව තියෙයි

රළ පතර සැඟව ආ
සුදු කවඩි බෙලිකටුව
ගිලිහි මුතු දසන් පා
උඩු බැලිව දිළුම් දෙයි…!


25 පෙබරවාරි 2021

Continue Reading...

අවශේෂ පත්‍ර....

 


සුවඳත් මතකයි මතකය සුවඳයි
දවසත් මතකයි එකමෙක දවසයි
ජීවිතයම එක මොහොතක් වී
ඉර හඳ ගිනිගෙන මිහිකත සසලව
ඔබ මම ඉපදී සුවඳැති මල් වී
පරවී මියැ දී නිසල වුනේ

පියවුනු නෙතු මත දෑඟිලි දිවගිය
සිහිනෙක දේදුණු පැහැ අතුරා
ජීවිතයම ඒ මොහොතයි නිසැකව
මේ ඉර හඳ ලොව තිබෙන තුරා

සමනල තටුවල ඇඳි රූ සටහන්
නොමැකෙයි නිසලව ගිලිහෙන දා
සමනල කන්දේ රෑ හෙවනැල්ලේ
සැනසිලි සිතිවිලි රැඳෙයි සදා

6 දෙසැම්බර් 2020
Continue Reading...

Saturday, January 28, 2023

මග සලකුණු

 



සිතියම් කිසිත් නැති බිමක
තනියෙන්ම ඇවිද යන සකි
ගීයක් හෙමින් මුමුණන්න
ඇහෙන හිත් අහුමුළු වලත් ඇති
උත්ථානයය කියන්නේම මරණය
හුස්ම හිරවී මැරෙන දවසකි
ගල්ලෙනක හංගා තියේ යැයි
හිතන්නටවත් හිතෙන් නැති
අන්ධකාරය වුනත් එහෙමයි
එළිය දල්වා හොයන්නට බැරි
ඒත් පියවුනු ඇහි පියන් යට
දහක් සිතුවම් මවන්නට හැකි
කඩා කුඩු කුඩු
කරපු සිරසක
පෙති පෙතිව
විසිරවුනු කවඳක
තියෙනවා හිත්
කිසිම දවසක
හැව ඇරී යලි
යලි උපදින්නෙ නැති....! 23 අප්‍රියෙල් 2021
Continue Reading...

අරුණල්ලේ සමුගැනීම...

 



ඈත්වී දුර යන්න කලියෙන්
පාත්වී සිප ගන්න ආසයි
මෑත්වී දොර කඩට එනවද
මගේ හිත නම් තාම සුවඳයි

ආදරේ බරණැස් පුරේ
මල් විසුණු මාවත් කොනේ
ජීවිතේ දෝතින් දරාගෙන
සිහිනයක අපි හමුවුනේ

සඳවතේ කළුවර එතී
කවුළුවක පියනක් වැසේ
හාදුවක දවටා ඇතී
සෙනෙහසේ පිණි බිඳු ඉසේ

13 නොවැම්බර් 2019
Continue Reading...

Friday, January 27, 2023

වසන්තය නම්.....

 


වසන්ත ගැනත් සිරි සිරි ගැනත් ‌‌එකට කියන මේ සිංදුව මොකාක් හරි හේතුවක් හෝ අහේතුවක් හින් දා, යූබටේ රන් කරන ගූගල් එකේ කස්ටිය තකහනියක් ‌මට පෙන්නූ එකකි. 


බුදුන් උපන්නාය කියන්නා වූ රටේ තරුණ කෙලි කොල්ලන් පිරිසක් හින් දා, බුදුන් වැඩි රටේ එකෙක් වූ මට ඒක නොඅහා යන්නට නම් හිතුණේම නැත. අහපු අහපු පාරට දැණුනු 'මෙව්වා' එක හින් දා, ආයෙත් අහලා අහලා, මෙතන එල්ලන වාය.

එයැයිලගේ ජන ගීයක්ය සැලකෙන මේ සිංදුවේ මුල් පද දෙක නම් කියන්නේ; "සිරි සිරි මදනල ගත කිති කවනා - හසරැල් නා දළු සලා" වගේ කතාවකි. ඒ ඉතින් වසන්තය එනවාය කියන ඉඟි බිඟි යයි. මේ නාද තාල අස්සේ දැනෙන ප්‍රමෝද ය, ‌‌තාලයටම බැරි වුනත් නිකමට වගේ අහල පහල තියන දේකට තට්ටු කරන්නට හිතෙන එක, ඒ බලාපොරොත්තුවේ උණුහුමමය කියා හිතෙයි.

හැබැයි මේ කොළු කෙල්ලන් වයන්නේත් ගයන්නේත් රඟන්නේත් නම්, මලක් මල් පෙත්තක් තියා එක ලදල්ලක්වත් හරියාකාරව පෙනෙන්නට නැති, ගඩොල් බිත්ති වලින් වටවුනු ‌සලපතල මළුවක ය, නැත්තම් තණ පතුත් වියලුනු ශුෂ්ක යැයි හිතෙන ලැහැබකය, ඒත් නැත්නම්, පේන තෙක් මානයේ තාර අතුරාපු, යකඩ අස්ස කරත්ත දුවන, මහ මගකය.

ඒ පින්තූර අස්සේ, වසන්තය තියෙන්නේ, අර කියන මදනල රැල්ලේ හැංගිලාම නමුත්, ඒ සුලං රැල්ල කිති කවා මතු කරන ප්‍රමෝදය නම් මේ මුහුණු මත දේදුනු පාටට සිතුවම් ව තියෙනවා මම දකිමි.

මේ ප්‍රමෝදය, ආද්ලාහය, අත්‍යන්තයෙන්ම ගිය අවුරුද්දේ, ‌ගෝල්ෆේස් පිට්ටනියේත් තරුණ මුහුණු මත සටහන්වී තියෙනවා ගූගල් කාරයාගේ  යූබටෙන් දැක්‌කෙමි. එදා එතැනට යන්නට එකතු වෙන්නට වාසනාව තිබුණු අයට, ඒක සජීවීව අත් දකින්නට, විඳින්නට, ලැබෙන්නට ඇති.

අද හැබැයි වසන්ත හිරේ ය. සිරී, වන්දි ගෙවන්නට බෝ ගහ හන්දියේ කැට හොල්ලන්නට ලක ලෑස්ති වෙනවා ය. එකේකාගේ මූණු වලට පාට පාට පාට කුඩු ඉහින උද්වේගකර හොලි උත්සවයක් මාර්තු වෙද්දී තියෙන්න්නට නියමිතව තිබෙයි. කුඩේ යට හැංගිලා කසු කුසු ගගා හොරගල් අහුලාපු කට්ටි දෙකක්, එළිපිට ජසයා ලෙන්චිනා නාගඩම නටන්නට පටන්ගෙන සිටිති.

මට නං හිතෙන්නේම වස්සාන සමය අත ලඟය කියාමය.




Continue Reading...

Thursday, January 26, 2023

වීදුරු

 



සුදුපාට වැලිකැට 
ගින්දරෙන් දියවී 
ඝනීභවනය වී හැදෙන 
අරුම පුදුම ද්‍රවයකි...
වීදුරු

පැතැලි,
සුදු,
වීදුරු ලෑලි 
පාර දෘශ්‍යයය...
ආලෝකයට... 
තාපයට...

එහෙත් නවතයි හඬ... 
සිනා හඬ 
හැඬුම් හඬ 
හෙමින්... 
ඉකි බිඳිනා හඬ

එහෙත් නවතයි සුවඳ... 
මල් සුවඳ 
පරමල් සුවඳ 
කුණුව ජරාවට යන 
සියලු දේවල ගඳ

එහෙත් නවතයි පහස 
පහස අතැඟිලි වෙලෙන 
තෙතමනය දෙතොලක 
උණුහුම පපුතුරක රැඳවුණු හිසක

මගේ වීදුරු බෝතලය තුළ හිඳ
බලමි මම 
බලමි මම ඔබ දෙස...
 
දෙතොල රැඳි සිනහව 
දෙනෙත් ගැඹරේ හීන...
දිනමිණ | වසත් සුළඟ | 2015 පෙබරවාරි 10 අඟහරුවාදා http://www.dinamina.lk/epaper/?id=24&tday=2015/02/10
Continue Reading...

Monday, January 23, 2023

මාලතී කල්පනා ගේ අරියාද්නේ













 

Continue Reading...

ශ්වේත තප්ත ජනේරුව නොහොත් විප්‍රවාසියාගේ ලතැවිල්ල




අළුත වට හිම වැස්ස පිරුවටක් සේ අතුල
මිදුල බිම කෙත් යාය මහ මගත් වියපත්ව
සිනාසෙද හඩන්නෙද හෙමින් ඉකි බිඳින්නෙද
දිග ඇදී දිගාවී නිසසලව සන්සුන්ව

හිමාලය මුදුන උස සීතලට හාදු දී
හුමාලය වී විලේ දිය රඟයි බොඳ වෙවී
ගිනි නැතිව දුම් නැගෙයි විල් තලාවේ පිරී
හිම තලාවට ගලා කඳුළු හැදෙමින් මිදී

පහන් රුක පහන යට නත්තලට ඇණ ගැසුව
කොල පාට නොගිලහුනු රිකිලි මල් සැරසිල්ල
මලානික විදුලි නෙතු කම්මැලිව පිය සලයි
ජනේරුව ආ වගක් ගිය වගක් අමතකව

පවන් වැල් පටලැවී සසලවී කරකැවෙයි
නිල මැකී අඳුරු වූ අහස දෙස නෙත් හෙලයි
හිම බැඳී සුද මිදුණ වෙවුලනා අගිසි අග
යන්තමට පණ තියෙන රතු රිබන් සැරසිල්ල

හොටින් හොට ගාවමින් පුරුදු කිචි බිචි නැතිව
උණුහුමක ඉඩ හොයන ගේ කුරුළු තුඩගකට
ගී ගයන හඬ ස්වර අහිමි කර සිර කෙරුව
ජනේරු​වෙ සුදුම සුදු සීතලේ ගිනි දළුව

ජනවාරි 26, 2011
Continue Reading...

Blogroll

About