හැත්තෑවේ ඡන්දය තිබුනේ මැයි මාසේ 27 වෙනිදා ය. ඒ ඡන්දයට පහුවදා ලෝකයට අළුත්ම ජීව කොට්ඨාශයක් වූ 28 ශ්‍රී කාරයෝ බිහිවූ හ. ජාතික ඇඳුම් මහන්නට ටේලර් සාප්පු වලට ඇනවුම් වැඩි වුනා පමණක් නොව රෙඩි මේඩ් ජාතික ඇඳුම් සාප්පුවලට ආයේද ඒ කාලයේ යැයි සිතමි. එයින් කාලයක් යනතුරු එජාප කෙනෙක් අපේ ගම් පලාත්වල හොයාගන්නා එක දුර්ලභ කාර්යයක් වී තිබුණේ ය.
පහුගිය සතියේ මුල් කාලයේ ඔය ජාතියේම ඌෂ්ණයක් තිබුණාය පෙණුනා මුත්, විසිදෙක මා කාරයෙක් වීම වනාහී, විසිඅට ශ්‍රී කාරයකු වී ලබාගත හැකි අතේ මිටේ වාසි ලබාගැනීමේ ටිකට් එකක් නොවන බව බොහෝ අය වටහාගෙන තිබේයැයි, එහෙන් මෙහෙන් ඇහෙන දෝස්මුර වල හර බර ඇරියාම පෙනෙයි.
ජනාධිපතිවරණයට පෙර, රනිල්ගේ රතු අලි පැටියාය කියා සජබය හංවඩු ගැසූ මාලිමාවේ අනුරට දැන් දැන් රට කරන හැටිත්, 'චුනෙන් දෙත' අරන් බලලෝභී වී ව්‍යසනයකට පත්වීමේ අවදානමත් කියා උගන්වා දෙන්නට, බොහෝ ටැලිපෝන් කාරයෝ දත කට මැදගෙන ඩයල් කරකවන බවත් පෙනෙයි.
එතනිනුත් එහාට යන සමහරු, අනුර කුමාරට රට බේරාගැනීමට දිවි හිමියෙන් කැපවීමට තමුන්ටත් චාන්ස් එකක් දෙනු පිණිස, මහ ඡන්දයේ දි එයාලාගේ පස්සය දිනවා පාර්ලිමේන්තුවේ බහුතරය ලබා දෙන ලෙසත් දෙකේ පංතියේ තර්ක ඉදිරිපත් කරති.
අනුරට රට ගිහින් නන්නත්තාර වී ඉන්නාවූ ද, රටේ ඕනර්ස් ලා හා ආර්ටිකේ අයිටිකාරයින් ය හිතාගෙන උන්නාවූ ද, මෙයාලාගේ කතා බහ මාධ්‍ය ප්‍රකාශ අහගෙන ඉඳිද්දී හිතුනේම නම්, දෙවියන් බේරා ගන්ඩ යකාට ඡන්දය දෙන්ඩ වාගේ ස්ලෝගන් එකකි. මේ සාතන්ලා සර්පයින් සේ බඩගා ඇවිත් අනුර කුමාරව ඇපල් ගෙඩියක් වගේ දික්කරන චිත්‍රයක් ඒ අස්සේ මගේ ඇස් ඉස්සරහ නටමින් තිබේ.
මේ වෙලාවේ, අපි සියළු දෙනා අධිෂ්ඨාන කරගත යුත්තේ නම්, එළඹෙන ඡන්දයේ දී, පාර්ලිමේන්තුවේ බහුතරය මතු නොව, හැකියාවක් ඇත්නම් මුළු පාර්ලිමේන්තුවම මාලිමාවටම ලියා දීමටය යන්න මගේ මතයයි.
අධිෂ්ඨානය එහෙම වුනත්, ඩිකී අංකල් රටේ හෙණ්ඩුව සදාකාලිකව අලි හොඬේ පටලවා තැබීමේ අභිප්‍රායෙන් ඇටවූ සමානුපාත ඡන්ද සංස්කෘතිය හින් දා, විපක්ෂයක් නැති ආණ්ඩුවක් රටේ ඇතිවෙන එක විය නොහැකි දෙයක් වී තිබේ.
මේ තීන්දුව ගන්නට තවමත් හිත පැකිලෙන්නේ නම් 2019 දී පටිගත කල අවුරුදු පහක් පරණ පහත වීඩියෝව මුල සිට අගටම අහන්න.
