මාත් එක්කම වාගේ 1982 ඔක්තෝම්බර වගේ කැනඩාවේ එඩ්මන්ටන් නගරයට ඇවිත්, ඇල්බර්ටා විශ්ව විද්‍යාලයේ පශ්චාත් උපාධිය සඳහා ඉගෙන ගන්නට පටන් ගත් රංජිත් මුහන්දිරම්, දවස් දෙකකට කලින් ඔය පින්තූර දෙක එවා තිබේ. මාත් රංජිතුත් නැවතී සිටි එපාර්ට්මන්ට් එකේ 1983 ජනවාරි පලවෙනිදා ගත් පළමු පින්තූරය ලාල් සෑම් කියා අපි කෙටිකර ගත් ලාල් සමරසේකර ඇල්බර්ටා විවියට ඇවිත් දවස් කීපයකින් විය යුතුය. චාන්දනීත් ආරියවංශත් වම් පැත්තෙනුත් රංජිතුත් මමත් දකුණු පැත්තෙනුත් තියාගෙන මැදින් වාඩිවී ඉන්නේ ලාල්ය.
ලාල් 1982 ඇල්බර්ටා එන්නේ, නවසිය හැත්තෑ එකේ ලංකාවේ හොඳම උසස්පෙල ප්‍රතිඵල (ඒ කාලේ වැඩ හතරකි. හැත්තෑ එකේ විද්‍යා ධාරාවෙන් හතරටම ඒ සමාර්ථ ගත්තේ දෙන්නෙකි. එක්කෙනෙක් ලාල් සමරසේකරය. අනෙක් කෙනා එල්. එස් ය.) වාර්තා කල දෙන්නාගෙන් එකකු ලෙස කොළඹ ආනන්ද විද්‍යාලයෙන් ඉගෙනීම අවසන් කර, පේරාදෙණියේ ඉංජිනේරු පීඨයට ඇතුළුව මූලික උපාධිය ලබා, බ්‍රිටිෂ් කොළම්බියා විවියේ, විද්‍යාපති උපාධියත් අරන්, ආචාර්ය උපාධිය හදාරන්නට ඔටාවා හි කාල්ටන් විවියට ගිහින් එතන වැඩ ගැන නොසෑහීමට පත්වෙලාය.
යාළු මිත්‍රකම් විශේෂයෙන් දේදුන්නේ අග්ගිස්ස සොයා කාන්තාරගතවූවන් සේ ගෙවෙන මේ දැණුම පසුපස හඹායන්නාවූ කාලයන්හි මුණගැසී අත්වැල් අල්ලා ගන්නවුන් අතර ඇතිවන යාළු මිත්‍රකම්, ලේසියෙන් ගැලවෙන ගැට නොවේ. ලාල් සම්බන්ධයෙන් නම් ඒ සම්බන්ධකම ජීවිත කාලයම පැවතුණායි ලියන්නට සිදුවී තිබේ. “හතලිස් අවුරුද්දකට පෙර“ කියා උධෘතය යොදා, රංජිත් මේ පින්තූර දෙක එව්වේත් ඒ නිසාමය.
එඩ්මන්ටන් හිත්, ඉන් පස්සේ රෙඩ්ඩියර් හිත්, එතනින් පස්සේ සස්කටූන් හිත්, එයිනුත් පස්සේ ටොරොන්ටෝවේ යෝක් විශ්වවිද්‍යාලයේ මහාචාර්ය වරයෙක් වශයෙනුත් වැඩ කල ලාල් සමරසේකර නම්වූ මේ සහෘදයා, මතක්වෙන වාරයක් පාසාම, නොවිය යුතුම යැයි හිතෙන රිය අනතුරකට ලක්ව, පසුගිය ඉරිදා අප හැමගෙන් සමුගෙන ගොස් තිබේ.
ජීවිතය එහෙමය, වෙලාව ආවාම කියන්නට බැරිය, අපි හැමෝම ඔතනට යනවාය මොන කතන්දර කතා තිබුණත්, මේ වැඩේ නොවිය යුත්තක්ම යැයි හැඟෙන එක නම් නවත්තන්නටම බැරි සිතිවිල්ලකි. මිත්‍රයකුට සමුදීම එකකි. මිත්‍රයෙක්, නොඑන සේම පිටත්වී යාම තවෙකකි.
ලාල් දැන හඳුනන, ලාල් ලඟින් ඇසුරු කල බොහෝ අය වෙති. ජීවිත කාලයක් කියන්නේ ලාල් වැනි හිතක් ඇති කෙනෙකුට අස්වැන්න ලෙස ගණන් කරන්නට අපහසු තරම් හොඳ හිත් එකතු කරගන්නට සිද්ධවෙන කාලාන්තරයකි.
මේ පහත සටහන, ලාල් ගැන සහෝදරත්වයේ මනුදම සංවිධානය තැබූ සටහනකි.
ආරම්භයේ සිටම මුල්පුරුකක් ලෙසින් සහෝදරත්වයේ මනුදම ශක්තිමත් කරන්නට අසීමාන්තිකව වෙහෙසෙමින් එහි අධ්‍යකෂක මණ්ඩලයේ සාමාජිකයෙකු ලෙසින්ද කටයුතු සම්පාදනය කරන්නට මෙන්ම සහෝදරත්වයේ මනුදමේ අපට නොමද ගුරුහරුකම් ලබා දුන් ශ්‍රී ලංකා කැනඩා ශිෂ්‍යත්ව පදනමේ සභාපති, කැනඩාවේ YORK විශ්වවිද්‍යාලයේ මහාචාර්ය ගරු. ලාල් සමරසේකර ගුරුපියාණන් හදිසි රිය අනතුරකින් අප අතරින් සමුගෙන ඇති බව දැනුම් දීම ඉතා ශෝකාකූලය. එතුමන් පුරා වසර ගනණනාවක් ගුරුපියෙකු ලෙසත්, නොයෙකුත් සාමාජීය සුබසාධක ව්‍යාපෘති සදහා මගපෙන්වන්නෙකු ලෙසත්, උත්තරීතර මනුශ්‍යයෙක් ලෙසත් ජීවත්ව සිටියදී සමාජයට කල මෙහෙවර මිල කළ නොහැක්කකි .
ඉදින්, එතුමන් අමාමහ නිවනින් සැනසේවා'යි සහෝදරයත්වයේ මනුදමේ අපි එක සිතින් ප්‍රාර්ථනා කර සිටින්නෙමු.
_________________________________
ඉපදුනනානම් දිනෙක මියැදෙනා බව දැනන්
ජීවිතේ පුරාවට කරා ඔහු පිංදහම්
අපරිමිත ස්නේහයෙන් පුරවලා මනුදනන්
අද නිහඩ වෙලා ඔහු නොකියාම රහසින්
ගුරු පියේ ඔබ අපට ඉගැන්වූ සියලු දේ
මිලක් කල හැකි වේද මේයැයි කිසිදිනේ
දුරින් සිට උවත් ළග වගේ අපි ළංවුනේ
ඔබ අපට පියෙක්මයි හමුවෙමුද ආයේ
මේපුවත අද අපිට දරා ගත නොහැකී
මේතරම් කිව නොහැකි දුකක් හද ගැබ්වී
බරහදත් දරාගෙන ආදරෙන් පතමී
අමාමහ නිවනින්ම සැනසෙන්න එහෙදී
-සහෝදරත්වයේ මනුදම සංවිධානය -
ලෙංගතුකම් උපතින් අරන් ආ හිත් ඇති මිනිසුන් එක්ක ජීවත්වෙන්නට ලැබීම කොතරම් වාසනාවන්ත කමක් දැයි හිතෙන්නේ, එවන් බැම්මක් බිඳී ගිය පසුවය.
අපි බොහෝ දෙනෙකුට ලාල්, ලලා වූයේ ලලා ගේ අම්මා ලලාට ලලා කිවූ නිසායැයි මගේ මතකයයි. අනූ ගණන්වල එඩ්මන්ටන් ආ ලලාගේ අම්මා, සස්කටූන් හි දි සමුගන්නා තුරුම ඇගේ දුක සැප බලන්නට ලාල් ඈ සමග සිටියේය. ලලාගේ මේ කාර්යය, අන් සෑම දෙයකටත් වඩා අපේ හිත් වලට දැනෙන දෙයකි. ඉතින් මේ වෙලාවේ ලලා ගැන මතකය, බෙදාගන්නට අපට ඇති වටිනාම දේ නම් ලලාගේ අම්මාගේ හිතිවිලි වලින් හිතා, මානෙල් අතින් ලියවුණු මේ පැදිපෙලය.
