සමස්ථානික ස්වර්ණා....

 "එකම මූලද්‍රව්‍යයක වෙනස් නියුට්‍රෝන සංඛ්‍යාවන් සහිත වෙනස් පරමාණුක න්‍යෂ්ටීන් පවතී නම් ඒවා සමස්ථානික ලෙස හැඳින්වේ. එනම් සමස්ථානික වල සමාන ප්‍රෝටෝන සංඛ්‍යාවක් තිබුණ ද වෙනස් නියුට්‍රෝන සංඛ්‍යාවන් ඇත.“ -විකිපීඩියා

සමස්ථානික ස්වර්ණා... බැළුවාම එකම වාගෙයි
හැසිරෙන්නෙත් එකම විදිහටයි
වෙන්කරල අඳුරන්න අමාරුයි
වෙනස තියෙන්නේ එව්වායෙ න්‍යෂ්ඨි වල
සංයුතියේ විතරයි...

යුරේනියම් වල ස්වර්ණා
බහුලවම තියෙන්නේ දෙසිය තිස්අට
ඒක පරමාණුක භාරය... 
නැත්තං න්‍යෂ්ඨියේ බර...
ඒකක දෙසිය තිස් අටක්...

ඒ අස්සේ සීයට දශම හතක් විතර
සීයට එකකටත් අඩුවෙන් තියනවා
දෙසිය තිස් පහ...
ඔය දෙන්නා හැඩ රුවෙන්
නටන දඟලන විදිහෙන්
කතා කරන වචනවලින්
හැම අතින්ම එකම විදිහට
පේන්නේ අපට...

ඒ වුණත් ස්වර්ණා... දෙසිය තිස්පහ
අස්ථායි සමස්ථානිකයක්...
කිසිම ආරෝපණයක් නැති
පරමාණුක භාරය එකක් වෙච්ච
උදාසීන නියුට්‍රෝනයකට පුළුවනි
දෙසිය තිස්පහ න්‍යෂ්ඨියක් කුඩු කරල දාන්න...

ඒක ඇතුලෙ තියන ප්රෝටෝන නියුට්‍රෝන
කෑලි කෑලි කඩල විසුරුවල දාන්න...
ඒ වැඩෙන් විසිරෙන නියුට්‍රෝන වලට පුළුවනි
වට පිටේ තියෙන තවත් දෙසිය තිස්පහේ
න්‍යෂ්ඨි එක්ක හැප්පෙන්න...

ඒ හැප්පිල්ලෙන් ජනිත වෙන නියුට්‍රෝන වලට පුළුවනි
තවත් දෙසිය තිස්පහේ න්‍යෂ්ඨි එක්ක හැප්පෙන්න...

ඒ හැප්පිල්ලෙන් ජනිත වෙන නියුට්‍රෝන වලට පුළුවනි
තවත් දෙසිය තිස්පහේ න්‍යෂ්ඨි එක්ක හැප්පෙන්න...

දාම ප්‍රතික්‍රියාවක්...
එක්කෝ දෙසිය තිස්පහ ඉවර වෙනතුරු
නැත්තං නියුට්‍රෝන කොහේ හරි හැප්පිලා නවතින තුරු
කැඩී බිඳෙන න්‍යෂ්ඨියක් තව දෙක තුනක්
කඩා බිඳ දමන දාම ප්‍රතික්‍රියාවක්...

මහා ශක්තියක් හිතන්න බැරි වේගයකින්
විසුරුවා දමන දාම ප්‍රතික්‍රියාවක්...

බිකිනි දූපත්... බිම්මල් වළාකුළු...
හිරෝෂිමා... නාගසාකි...
පරමාණු බෝම්බ...
ත්‍රී මයිල් අයිලන්ඩ්, 
චෙනර්බොයිල්,
ෆුකුෂිමා....
න්‍යෂ්ඨික බලාගාර...

ඇහැට තියා... ප්‍රබලම අන්වීක්ෂයකටවත් නොපෙනෙන...
නියුට්‍රෝනයක් හැප්පිලා කඩා වැටෙන
යුරේනියම් දෙසිය තිස්පහේ වැඩ... 

හැබැයි ස්වර්ණා...
ලෝකය පුරාවට... 
හාරසිය හතලිකට වඩා
න්‍යෂ්ඨික බලාගාරවල...
අද... ඔයා මේ වචන කියවන
මේ මොහොතෙත්...
ඇහැට තියා... ප්‍රබලම අන්වීක්ෂයකටවත් නොපෙනෙන...
නියුට්‍රෝනයක් හැප්පිලා කඩා වැටෙන
යුරේනියම් දෙසිය තිස්පහ...
ශක්තිය, විදුලිය, තාපය නිපදවනවා...

පරිස්සමින් බලා කියා ගත්තොත් ස්වර්ණා...
දාම ප්‍රතික්‍රියාවක් වුනත්... 
බිම්මල් වලාකුළක් නැතුව...
හිනා මූණකින් සලකුණු කරන්නත් පුළුවන් නේ ද?

හැම වෙලෙම විමසිල්ලෙන් ඉන්නෝනා...
සමස්ථානික ස්වර්ණා... බැළුවාම එකම වාගෙයි
හැසිරෙන්නෙත් එකම විදිහටයි
වෙන්කරල අඳුරන්න හරිම අමාරුයි
වෙනස තියෙන්නේ එව්වායෙ න්‍යෂ්ඨි වල
සංයුතියේ විතරයි...

පරෙස්සමින් බලා කියා නොගත්තොත්
ඇහැට තියා... ප්‍රබලම අන්වීක්ෂයකටවත් නොපෙනෙන...
නියුට්‍රෝනයක් හැප්පිලා කඩා වැටෙන්න...
අපි එක්ක අපි වගෙම අපි වාගෙම
හිනාවෙන... ගී ගයන.. දුව පනින... නටන වයන...
අපේම සමස්ථානිකයකටත් පුළුවනි...

-හමුවෙන්න බැරිවුනු පුබුදුගේ මතකයට-

Continue Reading...

මගේම සුවඳ සුවඳ සුවඳම නාමලට

 

මගේම සුවඳ සුවඳ සුවඳම නාමලට

අනේ මගේ පැටියෝ

ඔයා නම් මගෙමයි

ඔයාගෙ ලියුම් දෙකම ලැබුණෙ අද

හරිම සුවඳයි එව්වා

මගේ අතත් එක්කම සුවඳයි දැන්

තවත් කෙල්ලෙක් එහෙමත් ඉන්නවද මන්දා

දෙන්න මේ තරම් සුවඳ ජාතී

කුසුම් දුන්නට ලියුම 

කුමාරිගෙ අම්මාට අහුවෙන්න ගිහිල්ලා 

ඒකි ඒකත් අරන් 

උන්ගෙ නැන්දලාගෙ අහ ගිහින්

අනේ පව් ඒකි නම් 

අපට හරි ආදරෙයි

සුසුදු පෙමට බාදා නම් ඇද්ද කොතරම්

මේ රුදුරු ලෝකේ නපුරු මිනිසුන්ගෙන්

ඒත් නාමල් මේ කෙල්ල දම්මී

ඔයාගෙමයි ඉතින් තියෙන තුරු ජීවිතේ

කපල දැම්මත් කෑලි හතකට

ඔයා අපෙ තාත්තා ගැන ලියපු දේ කියවද්දි

මතක් උනේ මට ඔන්න රන්කැටියෝ මගේ

ඔයත් රැවුලක් නම් වවන්නම ඕනි

දැක්කනේ තාත්තගේ අපෙ

තියෙන ලස්සණ උඩු රැවුලෙ

අපේ අම්මත් ඒ දවස්වල

රැවුලට තමයි තාත්තගේ

ඉඳලා තියෙන්නේ ආසාවේ

කවද හරි මමත් ආසා

ඔයත් ඒ වගේ රැවුලක් එක්ක

ඉන්නවා නම් උජාරු විදිහට

අපේ පොටෝ එකෙත් ඔන්න

ලියුමෙ මෙතන ඔන්න ඔයාට

X X X X X X X X X X

තිබ්බා ලොකුම ලොකු හාදු දහයක්

තීන්තත් වැදුනා මගේ නිකටේ

ඒක පැටියෝ ඔයා මේ කෙල්ලට

දුන්නු පොරොන්දුවටයි විභාගේ ගැන

මගෙ පුංචි රන් කැටියා

ලොකු මහත්තයෙක් වෙලා කවදා හරි

ඇමරිකාවෙත් යනවා මට සත්තයි

අතුලලාටත් පුළුවන්නම්

මොනව කිව්වත් අපේ අම්මා

නාමල් ඔයාටත් පුළුවනි යන්න

ඇමරිකාවටත් කවදහරි

එදා තාත්තා ගෝරනාඩු කලාට පස්සේ

ආයෙ නෑ ආවේ මහගෙදර අය නම්

වැඩට ගෙනියන්න කොළඹ ගෙද‍රට

රත්නපුර පැත්තේ සුනාමි ළමයෙක්ව

ගෙනිච්චලු ඒ ගෙදර, අම්මායි කිව්වේ

එයාට නම් තාමත් හිතට අඩුවක් වගෙයි

“ගෙදරටම ගෙන ආපු

ස්වීප් එක ගත්තෙ නෑ

උඹට කවදාක හරි

තේරේවි මෙව්වා”

කියල සැරයක් දෙකක්

දුන්නා පුංචි අ‍ඳෝනාවක්

හාමිනේටත් ඇතිවෙලා එනවාලු ආයෙමත්

ඒ නිසා මහගෙදර මකුළු දැල් කඩන්නයි

පුටු මේස හදන්නයි ඇඳන් පිහ දමන්නයි

මේ ටිකේ මමයි මල්ලියයි දෙන්නාම එහෙ ඉන්නෙ

කවුරුවත් නැති නිසා අපට හොඳ චාන්ස් එක

සින්දු හෙම අහනවා ටි වීත් බලනවා

ඔයාව නම් මට ඉතින් හැම තැනම පේනවා

ඒත් මක් කරන්නද අම්මාත් ඉන්නවා

කුමාරියා කිව්වා විපුලයා කියලා

ලියුම දුන්නේ කුසුමලාට

ඒවාගෙ අය අතේ බය නැද්ද මේ වගේ

එවන්නට රහස් දේවල්

කට කතා ගියොත් හෙම

ඔයාටත් හොඳම නෑ

මොකක් වෙද දන්නෙ නෑ

අ‍නික් එක මගෙ සුදෝ

ආස නෑ මේ දම්මි

මගෙ කොල්ල ලියන‍ දේ

බලනවට කවුරුවත්

ලෝබයිනෙ පැටියෝ ඔයා ලියන එව්වා

පෙන්නන්න කාටවත්

ලබන සතියේ විතර ආයෙ අපි

ගෙදර යයි හාමිනේ ආවාම

ඉවරයිනෙ සැප ඉතින්

කුෂන් පුටු වල විඳපු

මිනිත්තුවකින් විතර

ෂෝ එකක් යනවා ටීවී

රට කතාවක් ඒක නම්

බලන්නම ඕනෑ එකක්

ඒ නිසා නවත්තමි

ලියාල තව ටිකක්

මගෙ පුංචි ලේනා

පුංචි රන් කැටියා

ඔයාගේ ලියුම් මම කොට්ටෙ යට තිබ්බා

රෑට පුසුඹට දැනෙන්න නිදද්දී

ඔයත් මේ ලියුම අද

ඒ වගේ තියා ගන්න‍

මාව මතක් කරගන්න

නිදියද්දි හැමදාම

නවය මාරට විතර

දෙන්නාම අපි ඇඳන්වල

හිතමු එක එක්කෙනා ගැන

හෙනම් මගෙ පැටියෝ

ආයෙ මුණ ගැහෙන කල්

හාදුවක් මේ එක්ක

කතිරයක් ගහපු තැන X

මං ඔයාගෙම ඔයාගෙම

කහපාටයි රතුපාටයි

බාලොලි මල

දම්මි

උපුටා ගත්තේ:

මහගෙදර ඇත්තෝ....

බ්ලොග් අඩවියෙනි.

පින්තූරය: ඉංගිරිය මධු ෆ්ලෝරා මුහුණු පොත් අඩවියෙන්

Continue Reading...